“Azərbaycan xalqının öz ölkəsini seçmək hüququ var. Bunun İrandakı molla rejiminə dəxli yoxdur”

Bu yaxınlarda Azərbaycanda olmuş ABŞ konqresmeni Dana Rohrabacher Amerika Konqresinə "Bölünmüş Azərbaycan xalqının öz taleyini müəyyənləşdirmək və istərlərsə, suveren ölkə yaratmaq haqqı"ndan bəhs edən qətnamə layihəsi təqdim edib.
"Azərbaycan xalqının öz siyasi strukturunu və ölkəsini seçmək hüquqları var", - cənab Rohrabacherin ofisindən “Turan”ın Vaşinqtondakı müxbirinə verilmiş bəyanatda deyilir.
"Bunun nə Vaşinqtondakı bürokratlara, nə də İrandakı molla rejiminə dəxli var. Azərbaycandakı etnik azərbaycanlılar suveren və müstəqill yaşayırlar, İrandakı azərbaycanlı əhalinin də eyni seçimi etməməsi üçün heç bir səbəb yoxdur. Bu prinsip İranda yaşayan bütün xalqlar üçün keçərlidir", - o bəyan edib.


Kaliforniyadan seçilmiş konqresmen Dana Rohrabacher 1989-cu ildən bəridir ki, Nümayəndələr Palatasının üzvüdür. O, Respublikaçılar partiyasındandır.
Keçən ay o, ABŞ dövlət katibi Hillari Klintona məktub yazaraq, Azərbaycan xalqının öz razılığı olmadan 1828-ci ildə Rusiya və Fars imperiyaları arasında bölündüyünü bildirmişdi. Dövlət departamenti isə məktubu aldığını və ölkələrin "ərazi bütövlüyünü dəstəklədiyini" bildirmişdi.
Azərbaycan Xarici İşlər Nazirliyinin sözçüsü Elman Abdullayev də mətbuata məsələ ilə bağlı açıqlamasında Bakının İranın ərazi bütövlüyünə hörmətlə yanaşdığını bildirib.

Azadlıq